اية الهدف ؟؟؟؟؟؟؟؟؟؟؟؟؟

اضراب عام لكل الشعب
يوم 6 إبريل خليك قاعد في البيت
أو شاركنا فى الميادين العامة
أوعي تنـــــــــزل لكن شاركنا
ماتروحشي الشغل
ماتروحشي الجامعه
ماتروحشي المدرسة
ماتفتحشي المحل
ماتفتحشي الصيدليه
ماتروحشي القسم
ماتروحشي المعسكر
عايزين مرتبات تعيشنا
عايزين نشتغل
عايزين تعليم لأولدنا
عايزين مواصلات أدمية عايزين مستشفيات تعالجنا................الخ....

دية رسالة وصلتنى من كذا مكان مختلف و بصراحة انا مش مقتنعة  و عايزة حد يفهمنى اية الفايدة اللى هتعود علينا من التصرف دة .انا مش معترضة اننا نعمل مظاهرات او اضراب او اى حاجة  نوضح بيها رفضنا للغلاء و لكل المشاكل اللى بتواجهنا يوميا فى مصر لكن اذا كان اللى بيتاذى هو الشعب مش المفترض ان الحل يكون مبياذيش المتضرر الأول  (الشعب) .....عايزة افهم يعنى لما يقولو متنزلوش الشغل طب ما هيتخصم من مرتباتهم اللى من ضمن اهداف الأضراب انها تزودها ....و لما يقولو متفتحوش المحلات طب صاحب المحل و اللى بيشتغلو عندة هيصرفو منين؟؟ .....لما ميفتحوش الصيدليات طب نجيب الدواء اللى نفسنا يرخص منين ؟؟ و لو الناس فعلا مشترتش اى سلعة فى اليوم دة طب ما تانى يوم هتشترى الضعف لان عندها نقص  بسبب يوم الاضراب ....و بعدين لو اللى هيشتركوا فى الأضراب او اللى هيرفضو الأشتراك اعترضو بعض الأضراب و اتكلمو عن اضرارة اول رد الحكومة هتردة هيكون الشعب هو اللى عمل كدة و احنا سبناة لتكتمل مسيرة الديمقراطية فى مصر ....................و بكدة نبقى خسرنا ان الشعب ياخد موقف مرة تانية لانة هيلاقى نفسه كالعادة المتضرر الوحيد .............
انا فعلا مش فاهمة ايه الغرض يمكن يكون جهل منى او ان الأضراب دة معمول لمجرد اننا نحس اننا بناخد موقف بغض النظر عن صحتة من عدمها .....لو المشكلة فى استيعابى انا فا يا ريت حد يفهمنى و لو هو فعلا مجرد موقف مالوش اى هدف فا.............!!!!!!! كدة تبقى الحكومة أذكى فا فى خططهم بيطلعو هما على الاقل كسبانين لكن احنا لا هنخسرهم و لا هنكسب .

شوية كلام

فية حاجة جوايا قالتلى ان أول مشكلة حقيقية هتقابلنى فى الحياة هتكسرنى و مش هعرف ارجع زى الأول تانى ابدا و جة فى دماغى موضوع وطى للريح عشان متكسركش ....خفت اووى لأنى معرفش ابقى حاجة غير اللى انا فية حاليا  فمعنديش حلول تانية  يمكن اكون غلط و محتاجة اتغير بس مش عارفة اتغير ازاى او يمكن مش عايزة  أصل الحاجات اللى الناس حواليا بيعلقوا على انى محتاجة اغيرها  بحس انى لو غيرتها ( دة لو عرفت يعنى )  هيتغير معاها حاجات تانية كتيرة و فى النهاية  هلاقينى كلى اتغيرت الحلو قبل الوحش ....فية تغيرات كتيرة اووى حصلت فى حياتى الفترة اللى فاتت  و كلها جذرية  و من كتر ما اللى حواليا بيجبرونى انى اثبتلهم حاجة معينة مبقتش عارفة  انا اية موقفى الحقيقى من اللى بيحصلى  ....حاسة  انى محتاجة  حاجة زى غسيل المخ كدة بس للروح  ..هو فية حاجة اسمها غسيل روح ؟؟؟  معرفش ليه كنت متخيلة  ان المشاكل اللى فاتت مؤقتة و شوية و هرجع زى الأول  بس دلوقتى حاسة ان مفيش حاجة هترجع زى الأول .....عايزة اتكلم مع حد يقولى الصح و الغلط ...بغض النظر عن انى مش شايفة سبب انى اكتب كل الكلام دة بس فى جميع الأحوال الحمد لله انا عارفة  ان مشاكلى  ولا حاجة جمب مشاكل ناس تانية كتيرة فا الحمد لله بس اهى فضفضة .

الضمير العربى على قد فهمى :D

الضمير العربى ....اوبريت جميل اوى و موثر جدا كان قبلة فى برضة الحلم العربى و سبحان الله كان برضة جميل اوى و برضة موثرجداا مفنكرش ان من ساعة ما الحلم العربى اتعمل لحد ما عملوا الضمير العربى و على حسب معلوماتى الفرق بين العملين حوالى 10 سنين معتقدش ان فية حاجة اتغيرت للاحسن بالعكس الوضع اصبح اسوء اكتر من الاول عشان كدة عملوا الضمير العربى يمكن الناس تفوق من اللى هى فية...اللى سمع الاتنين هيلاقى ان فى الحلم العربى اتكلمو عن فلسطين و دلوقتى فى الضمير بيتكلمو عن فلسطين و لبنان و العراق و ربنا يستر ....بجد الاوبريت هايل اوووووووى و المخرج كويس جداااا و جاب لقطات موثرة و بتعبر عن الكلام اللى بيتقال فى الاوبريت كويس جدااا مش مجرد مجموعة صور من الاخبار محطوطة ورا بعض و خلاص تقريبا مدة الاوبريت حوالى 40 دقيقة و انا طول ال40 دقيقة دول عمالة اعيط من بشاعة الصور و قوة الكلام اللى بيتقال و متهايئلى كل اللى شافوا الكليب عملوا زى و طبعا السوال الابدى هو و بعد ما هنعيط هنعمل اييييييييية ؟؟؟؟؟؟؟؟؟؟؟؟؟ يعنى اللى شوفناة هياثر فينا ولا التاثير تاثير موقت لحد ما الاغنية اللى بعدها تيجى فننسى كل حاجة و لو اغنية من بتوع نانسى و لا هيفاء و لا اتباعهم يبقى هننسى كل حاجة و نبيع القضية اللى اساسا متباعة بس معرفش لية المرة دية حسيت بفرق يمكن عشان مبصتش للكليب على انة بيتكلم عن العدوان و الاحتلال و القيادات الظالمة اللى بتغزو او القيادات السلبية اللى بتسكت ...معرفش لية بعدت فكرة الاوبريت عن الحاجات العامة يعنى مقولتش ان بوش او كوندليزا ريس ظالمين و ان مبارك و بقيت قادة العرب ضميرهم اخرس شفت الاوبريت من زاوية تانية خالص معرفش دة المقصود من فكرة الاوبريت و لا انا شطحت بخيالى شوية ......انا شفت ان الجندى الامريكى او الانجليزى او بتوع حماس اللى بيضربوا فى بتوع فتح و العكس او الشيعة و السنة اللى بيضربوا فى بعض هما دول اللى فى ايدهم تصحيح الوضع بمعنى ان بوش ظالم ماشى بس ازاى الجندى بتاعة قابل انة يقتل طفلة او يضرب ست او يتلذذ انة يذل واحد اعزل .......قصدى ان الشيطان دايما موجود و عمرنا من هنصحى يوم نلاقية اختفى الاختلاف اللى ممكن يحصل لما الناس تبطل تسمعلة و تنفذلة رغباتة ....قصدى ان الظلم بيجى من الفرد مش من مجتمع كامل فا لو الفرد دة مظلمش يبقى المجتمع ككل هيبقى كويس ......فى جملة حلوة اووى بتتقال قبل و بعد الاوبريت(شجر الظلم مش بتطرح غير الظلم)فا محدش يفتكر ان الظلم موجود بس فى الحروب او عند الناس اللى عندها سلطات كبيرة لااا اى حد فينا ممكن يظلم لان داينا هتلاقى انك اقوى من حد معين فممكن تظلمة بس متفتكرش ان الحياة بتتجزء هتتردلك برضة على صعيد تانى زى العراق من كام سنة ضربت فى الكويت و موتت ناس كتير من غير حق فادلوقتى بتضرب من الامريكان من غير ما يكون عند الامريكان حق و هيجى اليوم اللى تضرب فية امريكا و...الخ الخ......يعنى باختصار انا شفت ان الظلم اللى ممكن نعملة فى حياتنا اليومية زى مثلا اننا ناخد حق مش حقنا اعتمادا على مكانتنا فى المجتمع او مستوانا او اى حاجة من الحاجات اللى بتقسم المجتمع طبقات دية صورة مصغرة للظلم فا اللى بيعملها ميعترضش على الظلم الكبير لانة بشكل او باخر جزء من الصورة الكبيرة ......غالبا محدش هيفهم حاجة من التخاريف اللى عمالة اقولها دية بس فو جميع الاحوال ادينى قلت اللى فى نفسى .....الى اللقاء اذا كان لينا عمر.....

اهداء اللى الاستاذ احمد بدوى.....شكراااااااااااااااااااااااااااااااااااااااD: