اية الحل ؟!!!

        اللى بيضايق او يتخنق او يجيلة اكتئاب غالبا بيتكلم مع حد فى اللى مضايقة و التانى يقولو كلمتين و يقنعة بيهم فا الاولانى يهدى و يبقى كويس و يتفائل. طب اللى يضايق بس عارف كل الاجابات  يعنى مفيش حد ممكن يقعد معاه يقولة حاجة تخرجة من حالتة دية يعمل اية ساعتها. و فى الحالة الدية المشكلة فين هل فى الشخص اللى مضايق لانة عارف  كل الردود و مش قابل حاجة منها ؟ طب هو يعنى بمزاجة ..ولا المشكلة فى اللى حوالين الشخص  اللى مش قادرين يساعدوة ؟ ولا ساعات الواحد لازم يمر بفترة اكتئاب و بعدين يبقى احسن و يرجع افضل من الاول ؟ مش عارفة بس انا حاسة كدة دلوقتى و مش فى ايدى حاجة و لا حد عندة حاجة يقولهالى تساعدنى و حتى لو فترة و هتعدى فا انا حاسة انها طولت قووووى و بجد زهقت من كتر الزهق ربنا يفرجها من عنده....حتى مش عارفة انا بكتب ليه ....................

مدرستى يا مدرستى D:

     اللى ميعرفش المعلومة الحيوية و المؤثرة جداااا فى حياة البشر فا انا فى سنة تانية كلية و عشان فى ناس مش بتعرف تحسب فا معنى المعلومة دية انى بقالى سنتين سايبة المدرسة بس مع ان مش دية المدرسة اللى قضيت فيها كل سنين التعليم نظرا لانى كنت بتنقل بين مدارس كتير و مع ان برضة مش كل الايام فيها كانت حلوة و لا التعليم كان كويس و لا كان فيها حمام سباحة او ملعب جولف ولا الكلام اللى ممكن يخليها مدرسة مفيش منها اتنين يعنى بس مع كل دة انا لسه لحد دلوقتى بروح المدرسة كل فترة و ببقى مبسوطة قوووووووووووووى لما اعمل كدة و اسلم على المدرسين و اشوف شكل المدرسة اللى متغيرش و شكلة مش هيتغير فى سنتة و بفضل اتفرج على شكل الطلبة اللى بحس ان تصرفاتهم نفس تصرفاتنا بالضبط لما كنا قدهم .
معرفش ليه لما بروح المدرسة برتاح نفسيا و ببقى مبسوطة و عندى سلام داخلى كدة .

اول اما دخلت الكلية كنت مضايقة قوووى و مكتئبة  مش من الكلية نفسها لا انا الحمد لله دخلت المجال اللى بحبه بس من حياة الجامعة نفسها  كنت حاسة كدة انى مش فاهمة حاجة و مفيش حد راضى ولا ناوى يفهمك يعنى كنت متاخدة من الجو دة  و كنت عايزة باى شكل اروح المدرسة  و فعلا روحت كانت اول مرة اروح من بعد ثانوى و اول اما دخلت حسيت انى مطمنة كدة زى الاحساس اللى بيجى لحد لما بيدخل بيتة بعد فترة غياب ..احساس بالارتياح و الالفة غريب مع ان نظريا المكان دة مبقاش بتاعى خلاص  و فى ناس كانت مضايقة من وجودنا طبعا عشان بنعطل مسيرة التعليم و بنحرم الاجيال الجديدة من تلقى العلم اللى احنا لحد دلوقتى  مش فاهمين اهمية العلم اللى خدناة دة اية غير حشو الكتب بس  طب يحشوها حاجة مفيدة كوسة مثلا ....لا لا الكوسة دية فى مسيرة العمل مش التعليم بلاش لخبطة  التعليم ليه نوع تانى  خااااااالص من الخضار .


    الغريب ان الاحساس دة مش كتير حاسينة زيى فا مش عارفة هو الاحساس بالامان دة خارج من المدرسة و لا منى ...بغض النظر عن مكان خروجة بس هو بيبقى احساس جميل  خصوصا لما تشوف فى عيون الناس انك كبرت فا تفتكر نفسك و انت صغير  بكل البراءة و الهبل اللى كانوا جواك .معتقدش انى ممكن احس نفس الاحساس ناحية الجامعة بعد ما اسيبها الا لو عملوا فى الجامعة فسحة و حصة العاب تفتكروا ممكن ؟!!!! هههههه

جملة تلخص حاجات كتير...

             فى ناس عمرنا ما هنسمع عنهم فى كتب التاريخ لانهم مش بيغيروا مجرى حياة الشعوب سواء بالسلب او بالايجاب بس الحقيقة ان فى ناس بتتمجد برضة بس مش فى ذاكرة التاريخ لا فى ذاكرة الناس اللى اتاثروا بيهم .احلى حاجة فى الناس دية ان مفيش حد هيختلف عليهم او يشكك فى صدقهم مع نفسهم او مع غيرهم لان تاثيرهم بيبقى مع ناس محددة و بطريقة شخصية . كل واحد فينا عنده شخصية او اكتر من اللى بتكلم عليهم دول اللى ساعات بنسميهم قدوتنا او مثلنا الاعلى او اللى بيغيرلنا حياتنا 180 درجة بمجرد تواجدة فى حياتنا و يمكن من غير نية مبيتة لان الناس ديه احنا اللى بنخترها مش هما اللى بيختارونا .

             واحد من الناس الجميلة دية قال جملة مع ان معناها بسيط و يمكن بديهى الا انها هزتنى قووووى و خلت عنيا تلمع كانى اكتشفت اكتشاف عظيم الجملة كانت " انا محدش يقدر ياذينى لان عمر ما حاجة هتاذينى الا لو علاقتى بربنا اتقطعت و محدش يقدر يقطع علاقتى بربى" .الشخص دة الدكتور اللى بيدرسلى و انا بعد الجملة دية سبت كل حاجة حتى الشرح اللى بيشرحوا و قعدت احلل الجملة و قلت صحيح مفيش بنى ادم يقدر ياذى بنى ادم تانى الا بأذن ربنا ...طيب لما كلة هيجى من ربنا و ربنا اصلا مش بياذى عبيدة يبقى اصلا مفيش اذية ممكن تجرالى و حتى الاحداث اللى بنشفها احنا مضرة او مؤلمة بيبقى وراها خير ..مهما كبرت او قويت او كان مداها طويل برضة اخرها خير حتى لو كان الخير دة هو ثواب صبرك على الازمة .

          طب بما ان الموضوع طلع ابسط من البساطة كدة امال ليه احنا عايشين طول الوقت خايفين ....يا خايفين نسقط يا خايفين من النجاح ياخد مننا حاجات تانية ...خايفين نحب و خايفين منحبش...خايفين نموت و مش دايما حابين نعيش .ليه كل دة ما الحسبة سهلة كل بايد ربنا  يبقى كلة خير . يبقى كلة اخره فى  فرح و رضا . اصل فعلا هنحس ازاى بمعنى الفرحة من غير ما نكون عارفين طعم الحزن ...ما احنا مش بنموت الا اما نعيش .و فى الاخر برضة حتى لو خفنا فا اللى مكتوب هيحصل مفيش مفر.

         شكرا لاستاذى على الجملة اللى مكنش قاصد يقولهالى بس خلتنى افكر فى حاجة تريحنى قووووى و تخلينى اعرف اعيش و استنى الفرج لما الدنيا تضيق عليا و انا متاكدة ان كله خييييييييييييييير.فى دعاء جميل قوووى لسه عارفاة قريب حاساة مرتبط بالى بقولة:

"هبني اللّهم الصبر والقدرة لأرضى بما ليس منه بد، وهبني اللّهم الشجاعة والقوة لأغير ما تقوى على تغييره يد، وهبني اللهم السداد والحكمة لأميز بين هذا وذاك"  
      
         جميل جداااا الدعاء دة خصوصا اخر جزء عشان هو الاساس  و اخيرا الحمد لله الذى لا يحمد على مكروه سواه ...
         

التطور الطبيعى ل.....مش عارفة بس فيه تطور حصل و خلاص...

و أنا صغيرة كان عندى ايمان غير طبيعى بفكرة الصداقة و ان التضحية للصديق ديه حاجة مفيهاش مناقشة و نظام بقه انتيمتى و اتخانق مع اهلى لو لمحو من بعيد او قريب انها بتضيعلى وقتى مثلا او اى حاجة من الملاحظات اللى بيقولها الاهل على صحاب ولادهم .
المشكلة ان بعد فترة لاقيت ان الناس مش بتتمسك بالصداقة قد ما انا فاهمة او فى الحالة اللى بتكلم فيها لما السنين بتعدى على الصديقين و هما معا بعض ساعات بيتصوروا ان العلاقة ديه خلاص مضمونة فا يروك يعمل علاقات تانية بما ان العلاقة الاولى هتفضل ثابتة اعتمادا على التاريخ المشترك يعنى.زى بالضبط المتجوزين اللى بيفترضوا ان خلاص الجواز اكبر دليل على حبهم لبعض و بيبطلوا يعبروا او ينموا الحب دة .بس المشكلة بقه ان لا فى حالة الصداقة ولا الجواز الموضوع بيمشى كدة اى علاقة لازم عشان تستمر تتطور لو وقفت شوية بتضعف و جايز لو محدش لحقها تفتر و تموت .

     نرجع للتطور الطبيعى للشىء اللى مش عارفة اسمية اية دة ...كبرت انا شوية -مش بفعل السنين للاسف لا بفعل التصرفات بتاعت الاصدقاء دول -و لما كبرت فهمت ان العلاقات بتاعت زمان مش هتفضل بنفس القوة بس عشان العلاقات دية هى اللى كانت معايا و انا شخصيتى بتتكون فا لما فقدت العلاقات دية شكيت فى مبدا الصداقة نفسه و قلت يبقى الصداقة المطلقة دية وهم المراهقة مش اكتر و ان الناس الكبار عندهم حق و مفيش حد بيفضل جمبك للنهاية.

     
      قعدت افكر كدة ليه الطرف التانى بعد  اكتشف -و كان اكتشاف مؤلم بصراحة - انها بعدت عشان علاقة تانية بس مع الجنس الاخر ...الصدمة مكنتش فى ان فية علاقة لا طبعا عادى  ما اكيد كل واحدة فينا هترتبط - مكنتش راسمة انى اتجوزها انا يعنى - بس الصدمة كانت فى ان فيه وعود كتيرة اوووى اتقالت و فجاءة اختفت ( نوضح تانى عشان موضوع وعود دة بيتفهم حاجة تانية ) قصدى على الكلام بتاع اننا هنفضل صحاب للابد  و ان لا يمكن حد يبعدنا عن بعض و الكلام دة ...اصلها حاجة من اتنين ياما كان اى كلام بيتقال ياما انا فاهمة كلمة للابد غلط . المهم ان العلاقة دية عشان كانت كبيرة عندى اووى شككتنى فى المبدا نفسه و مبقتش عايزة ارتبط باى علاقة صداقة جامدة لا يجيى اليوم اللى تبعد فيه و اتاثر انا تانى و قلت ايه يمكن فعلا مفيش صداقة بستمر بقوتها و ان اللى بيستمر هو علاقة الارتباط مع شخص من الجنس الاخر ( اللى هو هتجوزة يعنى مش اى حد من الجنس الاخر و خلاص  مش هيصة هية :D )


     قلت طيب يبقى الامل فى الفارس اللى جاى راكب الحصان الابيض -هو فية حد لسه بيعرف يركب خيل اصلا اللى بيعرف يقولى و انا احددلة ميعاد مع بابا  و هنبقى ننظر فى امرة ههههه-  المهم اقتنعت بموضوع الحصان الابيض دة قصدى يعنى اللى هرتبط بية بس كنت شايفة انى مش هعمل زى اغلب صحابى و ارتبط حوالى خمس او ست مرارات على الاقل  لحد ما يجى الفارس المنتظر -انا بتكلم عن الارتباطات اللى خارج نطاق الخطوبة و كدة لو خطوبة يبقى الموضوع نصيب لكن اصاحب ميت مرة قبل ماتجوز دة اسمة فضا - المهم بما انى خت قرار بانى مش هرتبط حاليا لحد ما لاقى الشخص اللى مش هتجوز غيرة فقررت اقعد بقة اتفرج على العلاقات اللى بتحصل حواليا من باب اكتساب الخبرة من تجارب الغير  و ياريتنى ما فكرت كدة . مش ممكن كمية الكلام اللى بيتقال و الوعود و المشاعر الفياضة و الجياشة و ...و كل الكلام الكبير دة و بعدين فى الاخر ينفصلوا و كل واحدج يشوف مستقبلة مع حد تانى -مستقبلة دة اللى هو الكام شهر اللى جايين لحد ما تتكرر نفس النهاية الماساوية.الفكرة انى اللى يسمع عن العلاقة و الكلام عن مشاعرهم يحس ان روميو و جوليت و عنتر و عبلة و كل الاموات دول بعثوا من جديد  طب امال اية اللى بيحصل و ازاى بيقدروا يبعدوا عن بعض  كدة بعد ما كان لو مسمعتش صوتة يوم نروح نزورها فى المستشفى عشان اغم عليها من الزعل  و كلام  كدة يقطع القلب بس برضه محدش قالى  ايييييييييية اللى حصل خلا اللى اتنين يقدروا يبعدوا عن بعض عادى كدة كانهم  معرفة قطر و خلاص وصلوا لاخر محطة ....

     انا معرفش الناس دية بتفكر ازاى و هل هما بيضحكوا على بعض و لا على نفسهم و فى الحالتين ليه بيعملوا كدة ...مهما كان اللى بيحصل دة بيضيع نقاء حاجات كتيييييير قووووووووووى جوانا  و حتى لو جيت قولت كلمة بحبك لحد انت فعلا بتحبوا هتحس ان معناها سخيف من كتر متقالت  و انت مش قاصدها ....مش فاهمة فعلا اية الغرض من اللى بيعملوة دة بس بالنسبالى ان شاء الله عمرى ما هاكون زيهم اولا ارضاءا لربنا و احتراما لاهلى و ثانيا عشان محسش فى يوم ان كلامى و مشاعرى بقوا مستهلكين ....


   
    طب و بعدين لا صداقة نافعة و لا ارتباط  يعنى انا كدة العلاقة الوحيدة اللى واثقة منها هى علاقتى بمامتى و مش بعيد قريب تتبرا منى هى كمان و ساعتها اية بقة امشى اكلم نفسى هو صحيح انا استاهل بس مش كدة يعنى التغيير حلو برضة  يالا ربنا يسهل بقة ....

و كان هذا موجز عن التطور الطبيعى للبتااع دة :D:D:D:D