فية حاجة جوايا قالتلى ان أول مشكلة حقيقية هتقابلنى فى الحياة هتكسرنى و مش هعرف ارجع زى الأول تانى ابدا و جة فى دماغى موضوع وطى للريح عشان متكسركش ....خفت اووى لأنى معرفش ابقى حاجة غير اللى انا فية حاليا فمعنديش حلول تانية يمكن اكون غلط و محتاجة اتغير بس مش عارفة اتغير ازاى او يمكن مش عايزة أصل الحاجات اللى الناس حواليا بيعلقوا على انى محتاجة اغيرها بحس انى لو غيرتها ( دة لو عرفت يعنى ) هيتغير معاها حاجات تانية كتيرة و فى النهاية هلاقينى كلى اتغيرت الحلو قبل الوحش ....فية تغيرات كتيرة اووى حصلت فى حياتى الفترة اللى فاتت و كلها جذرية و من كتر ما اللى حواليا بيجبرونى انى اثبتلهم حاجة معينة مبقتش عارفة انا اية موقفى الحقيقى من اللى بيحصلى ....حاسة انى محتاجة حاجة زى غسيل المخ كدة بس للروح ..هو فية حاجة اسمها غسيل روح ؟؟؟ معرفش ليه كنت متخيلة ان المشاكل اللى فاتت مؤقتة و شوية و هرجع زى الأول بس دلوقتى حاسة ان مفيش حاجة هترجع زى الأول .....عايزة اتكلم مع حد يقولى الصح و الغلط ...بغض النظر عن انى مش شايفة سبب انى اكتب كل الكلام دة بس فى جميع الأحوال الحمد لله انا عارفة ان مشاكلى ولا حاجة جمب مشاكل ناس تانية كتيرة فا الحمد لله بس اهى فضفضة .
الاشتراك في:
تعليقات الرسالة (Atom)
هناك تعليق واحد:
ايه ده ؟ بقى مش عارفة غسيل الروح ؟؟
أنا أول مرة سمعت الموسيقى بتاعة فرقة نغم مصرى حسيت أن حصل لى بالضبط غسيل روح و غسيل الروح محتاج بس احساس جميل قوى مركز تعيشى فيه لمدة معينة و بعدها حتلاقى أن معنوياتك و أفكارك كلها نورت و انتعشت بمعنى أصح
***********
بالنسبة لموضوع أن أول مشكلة حتقابلك حتكسرك فالحقيقة هى مش حتكسرك بس يمكن تغير نظرتك للأمور ... يمكن يتهيألك ساعتها ان ده انكسار
بس ده تطور لازم فى حياتك لأن الدنيا كلها مشاكل و كل مشكلة بتقابلنا بتغير اتجاه حياتنا حبة بحبة ... المهم تفضل دينا الاصلية موجودة و ما تتمسحش من جواكى عشان شوية مشاكل
الناس اللى بيجبروكى تثبتى لهم حاجات معينة جوة دماغهم عشان يفضلوا حاطينك فى تصنيف معين لازم تبقى مقتنعة أن رأيهم فيكى مش مهم
عبرى عن رايك أنتى و قولى كلامك أنتى و أفكارك أنتى و اللى مش عاجبه ممكن يرمى نفسه من أقرب بلكونة ... طالما مش بتجرحى حد ولا بتأذى حد فمش من حق حد يقول لك ازاى تفكرى و ازاى تتكلمى ... لأن لو فضلتى تقولى اللى هما عاوزينه حتنسى انتى عاوزة ايه للأبد ... و على فكرة أسهل حاجة أن الواحد يبقى دمية ملهاش استقلال ... تابع يسيب غيره يفكر بداله و يبقى هو ولا حاجة
فيه ناس بيحبوا يبقوا كدة ... بس بلاش أنتى تبقى زيهم
إرسال تعليق