السيناريو : (س) يقابل (ص) فا مستريحوش لبعض مش مهم ديه حاجة طبيعية و وارد تحصل بس اللى مش طبيعى و مش المفروض يحصل ان (ص) يتكلم عن (س) باشياء مش من حق (ص) خااااااااااااالص انه يتكلم فيها ببساطة لان محدش طلب منه يقيم اخلاق و نصرفات البشر و على فكرة دة فى الحالتين سواء هو مقتنع ان كلامة صح او هو بيحور من اجل اثراء المحادثات ببعض الفلفل و الشطة فا فى الحالتين مفيش حاجة تديك الحق انك تتكلم عن اى حد مهما كان رايك فيه و اقولك على حل حلو اوى اللى ميعجبكش احرمه من شرف معرفتك و اقطع علاقتك بيه لكن منبقاش قصاد بعض اصحاب و حبايب و قدام ناس تانية تقول كلام يسىء ليا و طبعا فى ناس هتصدق لسببين اولهم انك بتختار ناس متعرفنيش - و للاسف احنا بنحب اوووى نجيب فى سيرة الناس و بنشعر براحة ضمير لو الماس ديه منعرفهمش شخصيا قال يعنى كدة احنا محترمين - وتانى سبب انط ظاهريا قدام الناس تظهر مع فى دائرة اصدقائى فا لما تقول عليا حاجة فا اكيد هى حقيقة و الناس برضه عشان تحلل لنفسها بتقول يعنى احنا هنعرفها اكتر من اصدقائها
دة السيناريو و مش من تاليفى و الله بس النتيجة انا اللى هتوقعها اللى هيحصل ل ( ص) ان عاجلا او اجلا هيتكشف ل (س) و معتقدش ان النتيجة هتبسطه ..لو حد من اللى سمعوا الكلام من ( ص) شاء القدر ان يقابل ( س) و اكتشف كذب ما افتراه ( ص) هيفقد (ص) مصداقيته للابد و على كل المستويات لانه الثقة لا تتجزا
معلومتين صغيرين ل ( ص) : اولا من الغباء انك تقلل من ذكاء الاخرين لان كشفك مش محتاج ذكاء على قد ما محتاج احساس و بصيرة و يمكن انت مش عارف قوة الكلمتين دول لانهم مش فى شخصيتك بس ثق ان دول هما هيكونوا السبب فى تعرية افعالك
المعلومة التانية : ان ( ص) و امثاله بجد ناس غبية جدا لازم يفهم ( ص) ان الناس اللى حواليه نوع من اتنين يأما ناس لسه مكتشفوش حقيقتة و فى الحالة ديه اول ما يكتشفوك ان شاء الله هيبعدوا عنك يأما ناس عارفة حقيقتك و دول بقه زيك بالضبط قدامك صحابك و من وراك انت عارف بقه شوف انت بتعمل ايه و طبقه عليك
من الاخر مصيرك فى المجتمع يا ( ص) انك هتعيش بتعرف ناس محترمة لبعض الوقت و بعدين تخسرهم بسبب سواد قلبك و ضميرك و اللى هيفضلوا معاك هما امثالك ممن يهتمون بظاهر العلاقات و ليس عمقها و دة احسن عقاب ليك
دة بقه المجتمع اما عقاب ربنا فا خد عندك بقه عقاب الغيبة و النميمة و الكذب و النفاق و الرياء و رمى المحصنات و كلها حاجات ما شاء الله توديك بالبريد السريع على النار عدل
اما عن ( س) فانت هتشوف امثال ( ص) كتير لان ( ص) لازم يقابل ( س) عشان يدخل النار فيه و ( س) لازم يقابل ( ص) عشان ربنا يشوف هل ( س) هيعمل زى ( ص) ولا هيفضل زى ما هو ( س) و يواجه ( ص) بالحق و الخير اللى جواه
فى طريقتين لمعاملة ( ص) يأما كل ما حد (س) يقابل حد ( ص) يقلب هو كمان ( ص) و فى الحالة ديه يضحك ( ص) فى سعادة لانه استطاع تقليل عدد ال ( س) و بكدة يكون ( س) ساعد ( ص) بشكل غير مباشر انه يثبت ان كلام ( ص) عن ( س) كان صح منذ البداية يأما ان ( س) يثبت على الصواب و يواجه الشر بالخير مش بالشر و فى الحالة ديه سيموووت (ص) غيظا و كمدا قولوا اميييييييييييييييييييين
ابقوا قابلونى لو حد فهم حاجة من اللى انا كاتباه دة و محدش يفكر يسالنى عشان انا مش متاكدة ان انا نفسى فاهمة
الاشتراك في:
تعليقات الرسالة (Atom)
ليست هناك تعليقات:
إرسال تعليق